ញ៉ូវយ៉ក៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងថា ជាងពីរឆ្នាំកន្លងមកនេះ រាជរដ្ឋាភិបាលកម្ពុជា បានខិតខំប្រឹងប្រែងក្នុងការទប់ស្កាត់ការរីករាលដាលនៃជំងឺកូវីដ-១៩ តាមរយៈការដាក់ចេញនូវវិធានការសុខាភិបាល អន្តរាគមន៍សង្គម និងសេដ្ឋកិច្ច និងវិធានការរដ្ឋបាល ដោយបានកំណត់ការចាក់វ៉ាក់សាំងកូវីដ-១៩ ជាវិធានការយុទ្ធសាស្ត្រជាគន្លឹះ។ ជាលទ្ធផល កម្ពុជាបានក្លាយជាប្រទេសមួយក្នុងចំណោមប្រទេស ដែលមានអត្រាគ្របដណ្ដប់ នៃចំនួនប្រជាជនទទួលបានវ៉ាក់សាំងជំងឺកូវីដ-១៩ ខ្ពស់ជាងគេក្នុងកម្រិតសកល។

ថ្លែងក្នុងមហាសន្និបាតអង្គការសហប្រជាជាតិលើកទី៧៧ នៅទីក្រុងញ៉ូវយ៉កសហរដ្ឋអាមេរិក សម្ដេចតេជោ ហ៊ុន សែន បានលើកឡើងថា ការសម្រេចបាននូវអត្រាចាក់វ៉ាក់សាំងគ្របដណ្ដប់នៃចំនួនប្រជាជនស្ទើរពេញផ្ទៃប្រទេសនេះ ធ្វើឲ្យសម្រេចបាននូវ "ភាពស៊ាំសហគមន៍" និងអាចបើកដំណើរការប្រទេសឡើងវិញបានពេញលេញនៅចុងឆ្នាំ២០២១ ក៏ដូចជាការស្ដារឡើងវិញនូវសកម្មភាពសង្គម-សេដ្ឋកិច្ចទាំងអស់ក្នុងគន្លងប្រក្រតីភាពថ្មីផងដែរ។

ក្នុងឱកាសនេះ សម្ដេចតេជោបានសម្តែងអំណរគុណ ចំពោះប្រទេសជាមិត្តទាំងអស់ ដែលបានផ្តល់វ៉ាក់សាំងកូវីដ-១៩ ដល់កម្ពុជាតាមរយៈក្របខណ្ឌទ្វេរភាគីនិងពហុភាគី ។

ជាមួយគ្នានេះសម្រាប់វិស័យសង្គម រាជរដ្ឋាភិបាលកម្ពុជាបានធ្វើការជាមួយដៃគូអភិវឌ្ឍន៍ ដូចជា ទីភ្នាក់ងារអង្គការសហប្រជាជាតិ ដើម្បីដាក់ឱ្យអនុវត្ត និងពង្រីកកម្មវិធីសំខាន់ៗ មួយចំនួន ដូចជា ១). កម្មវិធីសាច់ប្រាក់ពលកម្ម ក្នុងគោលបំណងកែលម្អហេដ្ឋារចនាសម្ព័ន្ធសហគមន៍ និងការផ្ដល់ឱកាស ការងារបន្ថែម និង ២). កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ដើម្បីជួយសម្រាល ការលំបាក និងរក្សាជីវភាពរស់នៅរបស់ប្រជាជនក្រីក្រផងដែរ៕